Friday, August 11, 2017

ಹೃದಯ

          
ಒಂದೊಮ್ಮ,
ವೈಭವದ ಹಂಪಿ. 
ಕೋಟೆ ಕೊತ್ತಲಗಳ 
ಸುತ್ತಲಲ್ಲಿ ಜನ. 
ಸಂಗೀತ,ಮಾಧುರ್ಯ 
ಮೆರವಣಿಗೆ,
ಕವಿಯ ಬರವಣಿಗೆ,
ಸಿಂಹಾಸನದ ಗಾಂಭಿರ್ಯ,
ಎಲ್ಲ ಗೆದ್ದ ಹಮ್ಮು,
ಸಹಜತೆಯ ಮಾಚಿ 
ಒಳೊಗೊಳಗೆ ನಾಚಿ 
ಸಂಭ್ರಮದ ಹಾಳೆಗಂಟಿದ 
ಸುಂದರ ತೈಲ ಚಿತ್ರ. 


ಈಗ,  
ಕಳಚಿದ ಕಂಬ 
ಹಳೇ ಸ್ಮಾರಕ 
ಆಗೊಮ್ಮೆ ಈಗೊಮ್ಮೆ 
ಬಂದು ಹೋಗುವ ಜನ,
ಇತಿಹಾಸದ ಮೆಲುಕು,
ಪ್ರತಿ ಪುಟದಲ್ಲು ಹುಳುಕು.  
ಕುಹಕಗಳ ಪಿಸುಮಾತು 
ಅರ್ಧ ಬಿದ್ದ ಗೋಡೆಗಳಲ್ಲಿ 
ಪ್ರತಿದ್ವನಿ. 
ಯಾರೋ ಅರ್ಧ ಬರೆದ ಚಿತ್ರ 
ನೆನಪು ಮಾತ್ರ. 

ಮತ್ತೆ,
ಒಡೆದ ಸ್ಮಾರಕ 
ನಾನು ಬಂಧಿ. 
ಮತ್ತೆ ಕಟ್ಟಿಕೊಳ್ಳಲು 
ನನಗೆ ನಾನೇ 
ನೇಮಿಸಿಕೊಂಡ ಸಿಬ್ಬಂದಿ. 


 

Saturday, July 29, 2017

ವಿದ್ಯುತ್ ತಂತಿ



ಎತ್ತರದ ಕಂಬಗಳಲ್ಲಿ
ಸದ್ದೇ ಮಾಡದೆ ಹರಿದಾಡಿ
ಅಲ್ಲಲ್ಲಿ, ಗಲ್ಲಿಗಳಲ್ಲಿ
ಕಾರ್ಖಾನೆಗಳಲ್ಲಿ
ಕೊಳೆಗೇರಿ ಬೀದಿಯ
ಗುಡಿಸಲುಗಳಲ್ಲಿ,
ಸಂಚಲನ ಮಾಡುವವೆ
ತಂತಿ ಕೊನೆಗೆ ಇಳಿಬಿಟ್ಟ
ದೀಪದೊಳಗೆ.

ಯಾರದೋ ವಿಶಾಲ ಚಾದರಗಳ
ಒಣಗಿಸಲು
ಹಗ್ಗ ಎಳೆದಂತೆ
ಕಂಬದಿಂದ ಕಂಬದ ಹೆಗಲಿಗೆ .
ಕಾಮಗಾರಿ  ಪ್ರಗತಿಯಲ್ಲಿದೆ
ಕತ್ತಲೆ ಓಡಿಸಲು .


ಪಾಳು  ಬಿದ್ದ ತಂತಿ ಮೇಲೆ
ಶಕ್ತಿ ಸಂಚಲನದ ಅಲೆ.
ಕಾಯೋ ಜನ ಗುಂಡಿ ಕೈಯಲ್ಲಿ ಹಿಡಿದು
ಹಳೇ ಬಲ್ಬು  ಉರಿವ ವೇಳೆಗೆ,
ಕಣ್ಣ ತುಂಬಾ ಒಮ್ಮೆ
ದೇವರ ಗುಡಿಯ
ಕೆಂಪಗಿನ ದೀಪ ನೋಡುವಾಸೆಗೆ.

ಗೋಡೆಗೆ ನೇತಾಡುವ ಲಾಂದ್ರ
ಅಪಶಕುನವೆಂಬಂತೆ
ಗಾಳಿಯಲಿ ತೂರಾಡಿತು
ಎಣ್ಣೆ  ಕುಡಿದ ಅಮಲಿಗೆ!.
ಮೂಲೆಯಲಿ ಕೂತ
ಅಜ್ಜಿಯ ಕೋಲು,
ಮತ್ತು ,ಜಪ್ಪಯ್ಯ ಎಂದರು
ಮೇಲೇಳದ ಕಾಲು
ಗಳ ನಡುವೆ
ನಿಸ್ತಂತು ವ್ಯವಹಾರ
ಎಂದೋ ಮುಗಿದ ಸಮಾಚಾರ.

ಕಣ್ಣ, ಬುರುಡೆ ದೀಪ  
ಆರೋ ಹೊತ್ತು
ಎದೆಯ ಬಾಗಿಲು ತೆರೆದು 
ಹಕ್ಕಿ ಹಾರಿತ್ತು.



ದುಡ್ಡು ತಿಂದ ಮಂತ್ರಿ
ಕುತಂತ್ರಿ.
ನಿಂತ ಕಾಮಗಾರಿ,
ಕತ್ತಲೊಳಗೆ ಕೊಳೆಗೇರಿ,
ಮೂಡದ ಸಂಚಲನ
ಅರ್ಥವಾಗದ ವ್ಯವಕಲನ.

ಗೋಡೆಬದಿಗೆ
ಜೋತುಬಿದ್ದ(ಸೋತು ಬಿದ್ದ),
ಹಳೇ ಸೀಮೆಎಣ್ಣೆ ದೀಪ
ಎಷ್ಟು  ಹೋರಾಡುದು
ಅದು ಪಾಪ.

ಜಡ, ಚೇತನ
ಮರಣ ,ಜನನ .

--------------------------------------------------------------ಸುಕೇಶ್








ಸಾಕ್ಷಾತ್ಕಾರ

ನವದ್ವಾರಗಳ ನಗರ
ತಲೆ ಗೋಪುರ 
ಕಂಡು ಕಾಣದೆ 
ಸುಮ್ಮನಿರುದೇ ಕಣ್ಣು 
ಕೇಳಿಯು ಕೇಳದಂತಿರಲು 
ಕಿವಿಗೆ ಭೋದಿಸಿ . 

ಎದೆ ಹೊಡೆವ ಘಂಟೆ,
ರಕ್ತದ ಚಲನೆ 
ಶುದ್ಧ,ಕಲ್ಮಶಗಳ ನಡುವೆ.  
ಒಂದೆಡೆ ನಿಲ್ಲದ ಕಾಲು 
ನಗರವನ್ನೇ ಎತ್ತಿ ಸಾಗಿದೆ 
ಅಲ್ಲಿಂದ ಇಲ್ಲಿಗೆ 
ಇಲ್ಲಿಂದ ಎಲ್ಲಿಗೆ? . 

ಮೌನಿಯಾಗದ ಬಾಯಿ 
ಬತ್ತದ ಕೊಳವೆ ಬಾವಿ,
ಮುಚ್ಚಿಕೊಂಡರೆ ನಗರವೇ 
ಖಾಲಿ,ಖಾಲಿ,ನೀರವ 
ಬಂಧಿ ಹಕ್ಕಿಯ ಗುಟುರಿಗೆ 
ನಗರದ ಮೂಲೆ, ಮೂಲೆ,
ಪ್ರತಿಧ್ವನಿಗಳ ಸ್ಥಾವರ. 


ಎಲ್ಲ ಕಡೆ ತೋರುವ ಮೂಗು,
ಎಲ್ಲ ಕಲಿವ ಹಂಬಲದ ಮಗು. 
ಗದರಿಸಿ,ಮಲಗಿಸಿ 
ಹೆಗಲಿಗೇರಿಸಿಕೊಂಡರೆ 
ಗಾಳಿ ಚೀಲ 
ನಾ ಹರಕಲು ಕುಚೇಲ. 

ನಗರ ನಿನ್ನದು 
ನನಗೆ ಒಂದಷ್ಟು  ದಿನದ ಗುತ್ತಿಗೆ 
ಮರೆತು,
ಸುಖಾಸುಮ್ಮನೆ ಮಲಗಿದ್ದೆ. 
ಎಬ್ಬಿಸು,ಉದ್ಧರಿಸು,
ಶುದ್ದೀಕರಿಸು,
ನಿನ್ನ  ಸಾಕ್ಷಾತ್ಕಾರದ ಭಕ್ತಿಗೆ,
ಮುಕ್ತಿಗೆ. 


--------------------------------------------------------------------------ಸುಕೇಶ್ 

Monday, June 19, 2017

"ಮಳೆ" ಒಂದು ನೆಪ

ನೀನು ನನ್ನ ಹಗಲುಗನಸು,
ಅದಕೆ ನನಗೆ ಇರುಳ ಮೇಲೆ ಮುನಿಸು
ಕ್ಷಮಿಸು, ಮತ್ತೆ
ಬೆಳಗಿಗೆ ಕಾಯುತ್ತೇನೆ
ತಾರೆಗಳ ಎಣಿಸುತ.

ಕುಂಟೆ ಬಿಲ್ಲೆಯ ಸದ್ದು
ಈಗಲೂ ಕೇಳುತ್ತದೆ
ನಿನ್ನ ನೆನೆಸಿಕೊಂಡು ಸುಮ್ಮನೆ
ಕುಳಿತರೆ,
ಕಲ್ಲು ಉಜ್ಜಿ , ಬೆರಳ ಜಜ್ಜಿಕೊಂಡು
ನೀ ಅತ್ತಾಗ, ನಾನು ಅಳುತಿದ್ದೆ
ಆ ಕಲ್ಲ ಮೇಲಿನ ಮುನಿಸು
ಇನ್ನೂ ಹೋಗಿಲ್ಲ,
ಗಲ್ಲ ಜಾರಿದ ಕಂಬನಿ
ಒರೆಸಿದ ಈ ಕೈ
ನಿನ್ನ ಮರೆತಿಲ್ಲ.

ಮೊದ ಮೊದಲ
ಸಣ್ಣ ಮಳೆಗೆ
ತೆರೆದ ಕಾಗದದ ದೋಣಿಯ
ಕಾರ್ಖಾನೆ .
ಹೆಸರ ಬರೆದು,
ಒಂದೊಮ್ಮೆ ಉಸಿರ ಎಳೆದು,
ಊದಿ ,ತೇಲಿಬಿಟ್ಟ
ಮೊದಲ ದೋಣಿ
ಈಗಲೂ ಸಾಗುತ್ತಿದೆ
ನೆನಪಿನಂತರಾಳದ ಸಾಗರದಲಿ.

ನೀ ಶಾಲೆಗ ನನಗಿಂತ  ಬೇಗ ಹೋದರೆ,
ಹೂದೆನೆಂದು ನನಗೆ ತಿಳಿಸಲು
ರಸ್ತೆಯಲ್ಲಿ ಹಾಕಿ ಹೋಗುತ್ತಿದ್ದ
ಒಂದು ಸೊಪ್ಪಿನ ಕಡ್ಡಿ,
ಅದು ಸಂದೇಶ ಮಾತ್ರವಲ್ಲ
ಮುಂದೆ ಆಗುವ
ನಿನ್ನ ಮುನಿಸಿನ, ಸಣ್ಣ ಜಗಳದ
ಸೂಚನೆ,
ನನ್ನ ಪೂರ್ತಿ ದಿನದ ಯಾತನೆ.

ತಪ್ಪು ನನ್ನದೇ
ಎಲ್ಲೋ ಮರೆತು ಬಿಟ್ಟ ಸ್ಲೆಟು, ಬಳಪ.
ಸಮಯಕ್ಕೆ ಸರಿಯಾಗಿ
ಕಾಲು ಮುರಿದುಕೊಂಡ ಚಪ್ಪಲಿ,
ಬಿಸಿ ಬುತ್ತಿಯಲ್ಲಿ  ಅಮ್ಮಮಾಡಿದ
ಕೋಳಿ ಸಾರು ನಿನಗೆಂದು ಎತ್ತಿಟ್ಟು,
ಅಕ್ಕ ನನಗೊಂದು ದೇವರ ಬೊಟ್ಟು ಇಟ್ಟು
ಕಳುಹಿಸಿ ಕೊಡುವಾಗ
ನನ್ನ ನೋಡಬೇಕಿತ್ತು ,
ನನಗೆ ನಿನ್ನ ನೋಡಬೇಕಿತ್ತು !!!

ದಾರಿ ತುಂಬಾ ನಾನು ಒಂಟಿ,
ಹಾಗೇ ನಡೆಯುತ್ತಿದೆ
ನಿನ್ನ ಪುಟ್ಟ ಹೆಜ್ಜೆಗುರುತುಗಳ
ಅನುಸರಿಸಿ.
ನಿನ್ನ ಕೋಪ
ವಾಲ್ಮೀಕಿಯ ಶಾಪ,
ಕೋಳಿ ಸಾರಿಗು ತಣಿಯಲೊಲ್ಲದು,
ಮಣಿಯಲೊಲ್ಲದು.
ಸಂಜೆ ಮತ್ತೆ ಜೊತೆಗೆ ನಡೆದರೂ
ತೆರೆಯದ ತುಟಿ, ಶಬ್ದಗಳ ಮುಷ್ಕರ,
ವಿಧಿಯಿಲ್ಲ ,ನಾನು ಕಾಯಬೇಕು ನಾಳೆ ನಿನ್ನ, 
ನಿನಗಿಂತ ಮುಂಚೆ ಬಂದು
ದಯವಿಟ್ಟು ಕ್ಷಮಿಸು ಎಂದು.

ನಿನ್ನಿಂದ ಎರವಲು ಪಡೆದ
ಕೈವಾರ  ಈಗಲೂ ಇದೆ.
ಕೆಲವೊಮ್ಮೆ ನೋಡುತ್ತೇನೆ,
ಅದರ ಮೊನೆ,
ನಿನ್ನ ನೆನಪಿನಷ್ಟೆ ಚೂಪು.
ತುಕ್ಕು ಹಿಡಿಯದಂತೆ
ನೆನಪ ಬಚ್ಚಿಟ್ಟಿದ್ದೇನೆ ಎದೆಯ
geometry boxನಲ್ಲಿ.

ಅಷ್ಟು ಬೇಗ
ದೊಡ್ಡವರಾದೆವು ಯಾಕೆ,
ಚಡ್ಡಿ ಬೆಳೆದು ಪ್ಯಾಂಟ್ ಆಯಿತು,
ನಿನ್ನ ಚಿಟ್ಟೆ ಚಿತ್ತಾರದ ಲಂಗ
ಬೆಳೆಯುದ ನಿಲ್ಲಿಸಿ
ಸಣ್ಣಗಾಯಿತು
ಸಂಪರ್ಕಕ್ಕೆ ಇದ್ದ ಹಳೆಯ ಫೋನ್
ತಂತಿ ಕಳೆದು ಕೊಂಡಿತು
ಎಡೆಯಕೊಂಡಿ,ಬದುಕ ಬಂಡಿ
ಯಾವುದೋ ತಿರುವುಗಳಲ್ಲಿ
ನುಣುಚಿಕೊಂಡಿತು,
ಕಳಚಿಕೊಂಡಿತು.

ಹೇ ಮೊನ್ನೆ ನೀನು ನಿನ್ನ ಮಗಳ ಜೊತೆ
ಫೇಸ್ಬುಕ್ ನಲ್ಲಿ
ಹಾಕಿದ ಫೋಟೋ ನೋಡಿದೆ
ಮುದ್ದಾಗಿದೆ,
ನೀ ಎಂದೋ ಹೇಳಿದ
ಒಂದು ಮಾತು ಮತ್ತೆ ಕಾಡಿದೆ
ಇರಲಿ ಬಿಡು
ಮೌನ ದಿನಪತ್ರಿಕೆಯಲ್ಲಿ
ಮತ್ತೆ ಬಿಸಿ ಬಿಸಿ ಸುದ್ದಿ
ಮುದ್ರಿಸಲಿ ಯಾಕೆ!!

ಮತ್ತೆ ಮಳೆ ಬರುವಹಾಗಿದೆ,
ಈ ಬಾರಿಯ ಮಳೆಯ ಸೀಸನ್
ನಿನಗೆಂದು ಮೀಸಲು,
ಮತ್ತೆ ಬರಿಗಾಲಲ್ಲಿ ನಡೆಯಬೇಕು
ಮಳೆಗೆ ನೆನೆಯುತ್ತಾ,
ಅಮ್ಮನ ಕೈಯಲ್ಲಿ ಕೋಳಿಸಾರು
ಮಾಡಿಸಬೇಕು
ಪಟ್ಟಿ ದೊಡ್ಡದಿದೆ. 

ಹ ಹೇಳಲು ಮರೆತೆ,
ನನ್ನ ಗೋಳು ಇದ್ದದ್ದೇ
ಮರೆತುಬಿಡು, 
ಅದು ನನಗೇ ಇರಲಿ,
ನೀನು, ನಿನ್ನ ಮಗಳಿಗೆ
ರೈನ್ ಕೋಟ್ ತೆಗಿಸಿ ಕೊಡು,
ಅದರಲ್ಲಿ ಚಿಟ್ಟೆ ಚಿತ್ತಾರವಿರಲಿ.

-----------------------------------------------------------------ಸುಕೇಶ್ 

Friday, June 16, 2017

ತಪ್ಪು

ಆಸೆ ನನಗೆ ತುಂಬಾ
ನಿನ್ನ ಕನಸುಗಳಲ್ಲಿ  ಜಾರಿಕೊಳ್ಳಲು
ಚಿತ್ತಾರಗಳ ನಡುವೆ ಸೇರಿಕೊಳ್ಳಲು

ಸುತ್ತಮುತ್ತ ಸಿಂಗಾರದ
ರಥದ ಬೀದಿ,
ಮನಸು ಮಾತ್ರ
ನೀ ನಡೆವ ತಿರುವುಗಳ
ಹಿಂಬಾಲಿಸುತ್ತದೆ

ಕಣಿವೆ ಹಾದಿಯಲ್ಲಿ
ದಾರಿ ತಪ್ಪುದು
ಜಾರಿ  ಬೀಳುದು ಸಹಜ
ಕಾರಣವೇನೇ ಇರಲಿ
ಕಾಣದೆ ನಿನ್ನ ಕೈ
ಹಿಡಿದುಕೊಳ್ಳುತ್ತೇನೆ
ತಪ್ಪು ನನ್ನದೇ !!!.

ತಪ್ಪು ನನ್ನದೇ ,
ದೇವರ  ಪ್ರತಿಮೆ ಮುಂದೆಯೂ
ಕಣ್ಣುಮುಚ್ಚಿ
ನಿನ್ನ ನೆನಪಿಸಿಕೊಂಡದ್ದು
ನನ್ನ ತಪ್ಪು,
ಬೀಳೋ ಮಳೆಗೆ
ಅಂಗೈ ಒಡ್ಡಿ
ಮೈಮರೆತಿದ್ದು
ಬಹುಶ ನನ್ನ ತಪ್ಪು.

ಸುತ್ತಮುತ್ತ ಜನ ಏನೇ ಅನ್ನಲಿ
ನನ್ನ ನಾನೇ ಮಾರಿಕೊಂಡು
ನಿನಗೆ ಬೆಲೆ ಕೊಟ್ಟದ್ದು,
ನನ್ನದಲ್ಲದ ತಪ್ಪಿಗೆ,
ಒಂದಿಷ್ಟು ಸಣ್ಣ  ಮುನಿಸಿಗೆ,ಮೌನಕ್ಕೆ
ಕ್ಷಮಿಸು ಅಂದದ್ದು
ನನ್ನ ತಪ್ಪು .

ಆಸೆ ನನಗೆ ತುಂಬಾ
ಎಲ್ಲ ಸುಳ್ಳುಗಳ ನಂಬಿಕೊಳ್ಳಲು
ನಿನ್ನ ಕನಸುಗಳಿಂದ ಜಾರಿಕೊಳ್ಳಲು.

ಸುತ್ತಮುತ್ತ
ಸಿಂಗಾರದ ರಥಬೀದಿ
ಮನಸೇ ಕ್ಷಮಿಸು ನಡೆದದ್ದು
ನನ್ನದಲ್ಲದ ಹಾದಿ!!!


-----------------------------------------------------------------------------------ಸುಕೇಶ್ 

Saturday, February 18, 2017

ಊರ ಜಾತ್ರೆಯಲ್ಲಿ ಬೊಂಬೆಯೊಂದು ಇಷ್ಟವಾಯಿತೇಕೆ -೨

ಬೊಂಬೆ ಕಂಗಳಲ್ಲಿ ಕಳೆದು ಹೋದ ಆ ಘಳಿಗೆ , ಅಮೃತ ಘಳಿಗೆ  . . . . . . . . . . . . . !!!!.

ಜಾತ್ರೆ ತೇರು ಮುಂದುವರಿಯುತ್ತಿತ್ತು, ನಾನಿನ್ನೂ ಬೊಂಬೆ ಅಂಗಡಿ ಮುಂದೇನೇ ಇದ್ದೆ, ಅದೇ ಬೇಕು ಎನ್ನುವ ಹಂಬಲ, ಒಂದಷ್ಟು ಗೊಂದಲದ ಜೊತೆ,

ಚಿಕ್ಕವನಿದ್ದಾಗ, ಅಪ್ಪನ ಜೊತೆ ಜಾತ್ರೆಗೆ ಹೋದಾಗಲೆಲ್ಲ  ಯಾವುದೊ ಬೊಂಬೆಗೆ ಹಟ ಹಿಡಿದದ್ದು, ಜಾತ್ರೆಗೆಂದು ತಂದಿದ್ದ ಹೊಸಬಟ್ಟೆಯಲ್ಲೇ ನೆಲದ ಮೇಲೆ ಉರುಳಾಡಿ ,ಅತ್ತು ರಂಪ ಮಾಡಿದ್ದು , ಸುಮ್ಮನಿರದ ನನ್ನ , ಅಪ್ಪ ಗದರಿಸಿ, ಹೆದರಿಸಿ ಸುಮ್ಮನಾಗಿಸಿದ್ದು, ಎಲ್ಲರ ಮೇಲಿನ ಸಿಟ್ಟಿಗೆ ಊಟ ಬಿಟ್ಟು ಉಪವಾಸ ಮಾಡಿದ್ದು, ಕಣ್ಣ ಮುಂದೆ ಊರ ಜಾತ್ರೆಯ ಬೀದಿ ಹಾಗೆ ತೇಲಿ ಹೊಯ್ತು.

ಯಾರದೋ ಕೈಯಲ್ಲಿ ಪುಟ್ಟ ಬೊಂಬೆ ಕಂಡಾಗಲೆಲ್ಲ ಎದೆ ಮೆಲ್ಲ ನಲುಗುತಿತ್ತು . . . . . .

ಈಗ ಹಾಗೆ ಮತ್ತೆ ಅತ್ತು ರಂಪ ಮಾಡಿದರೆ ???.

ಸುಮ್ಮನಿದ್ದ ನಾನು , ಏನೋ ಕಂಡು ತಡಬಡಿಸಿ ಎದ್ದು , ಕಣ್ಣುಜ್ಜಿ ನಿನ್ನ ಕಂಡಾಗ , ಕಣ್ಣ ರೆಪ್ಪೆಗಳು ಮುಚ್ಚದೇ ಹಾಗೇ ನೋಡುತಿದ್ದವು. ಇಷ್ಟು ದಿವಸ ಎದೆಯ ಸೂತ್ರ ಹಿಡಿದು ಕಾದದ್ದು ಬಹುಶ ನಿನಗೇ ಇರಬೇಕು ಅನ್ನಿಸುತಿತ್ತು .

ಊರ ಬೀದಿಯಲ್ಲೇ
ದಾರಿ ತಪ್ಪಿದ ಹಾಗೆ,
ಮನಸು ದಿಕ್ಕು ಕೆಟ್ಟು ಕಂಗಾಲು,
ಸೂತ್ರವಿರದೆ ಹಾರಿತೆಲ್ಲೋ
ಹೃದಯ ಯಾಕೋ
ಸಣ್ಣ ದಿಗಿಲು .


ಒಂದೆರಡು ದಿನದ ಹಿಂದೆ ಚಂದಿರ ಮೈ ತುಂಬಿ ಹೊಳೆಯುತ್ತಿದ್ದ , ಬಾನ ತುಂಬಾ ಹುಣ್ಣಿಮೆಯ ಕಳೆ, ಭೂಮಿ ಉಸಿರ ಬಿಗಿ ಹಿಡಿದು ಆ ಘಳಿಗೆಗೆ ಕಾಯುತಿತ್ತು.

ನೀ ನನಗಿಷ್ಟವಾದ ಬಟ್ಟೆ ಉಟ್ಟು ಬಂದ ದಿನ ನಾ ನಿನಗೆ  ಕಾದಂತೆ . . . . . . . !!.

ಈ ಸಂಜೆ ಯಾಕೋ ತುಂಬಾ ಮೆಲ್ಲನೆ ಜಾರುತ್ತಿತ್ತು, ಬಾನ ತುಂಬಾ ಹಾರೋ ಹಕ್ಕಿ, ಮರಳಿ ಗೂಡು ಸೇರೋ ಬಯಕೆ,ಪುಟ್ಟ ಗೂಡಲ್ಲಿ ಕಾವೇರುವ ಮೊಟ್ಟೆ.
ಪಡುವಣ ಕಡಲಿನಲ್ಲಿ ಸೂರ್ಯ ಕಾಲು ತೊಳೆಯುತಿದ್ದ ಹಗಲಿಡೀ ಗಾರೆ ಕೆಲಸ ಮಾಡಿ ಸೋತು, ನೀರಿನ ತುಂಬಾ ಮಣ್ಣಿನ ಬಣ್ಣ.

ಒಂದು ಪೇಲವ ಮೌನ, ಮಾತಿನ ಕೊರತೆ, ಕಟ್ಟಿಟ್ಟ ಶಬ್ದಗಳ ಒರತೆ, ಹೇಳಬೇಕು ಎಂದು ಅಂದು ಕೊಂಡದ್ದನ್ನು ಹೇಳಿದ್ದರೆ ಇಷ್ಟೆಲ್ಲ ಬರೆಯ ಬೇಕು ಅನ್ನಿಸುತ್ತಿರಲಿಲ್ಲವೇನೋ. ಕರಗುವ ಸಮಯದ ಜೊತೆ ಕೊರಗುವ ನೆನಪು, ನೀ ನೆಪ .. .. . . .. . . .!!!!.

ಮಾತ ನಡುವಿನ
ಪುಟ್ಟ ಮೌನ,
ಬಿಡುವೆ ಇರದ
ಧ್ಯಾನ,
ಕ್ಷಣಿಕಕಾದರು
ಸೋಲಲೊಲ್ಲದೆ
ನನಗೆ ನಿನ್ನ ಮನ.


ಇರುಳ ಚಾದರ ಭೂಮಿ ತುಂಬಾ ಯಾರೋ ಎಳೆಯುತ್ತಿದ್ದರು ಅವಸರ ಅವಸರವಾಗಿ. ಪುಟ್ಟ ಗುಬ್ಬಿ ಹಕ್ಕಿ ಆಗಲೇ ನಿದ್ದೆಗೆ ಜಾರಿತ್ತು ,ಕಣ್ಣ ತುಂಬಾ ಕನಸು, ಒಣಗಿದ ಕಣಗಿಲೆಯಲ್ಲೊ ಮಧು ಮಕರಂದ ಸಿಕ್ಕಿದಂತೆ,

ಕನಸೇ ಮುಂಜಾನೆಗೆ ಭರವಸೆ. ಹಕ್ಕಿ ಬೆಳಗೆದ್ದು ಕಣಗಿಲೆ ಮರ ಹುಡುಕಬಹುದೇನೋ ... . . . .!!!

ಬಿದ್ದ ಕನಸುಗಳ
ಸಾಲು ಸಾಲು,
ಅವುಗಳಲ್ಲಿ ಹೆಚ್ಚಿನವು
ನಿನ್ನದೇ ಸಿಂಹಪಾಲು.
ಎದ್ದ ಕೂಡಲೇ ಕಣ್ಣುಜ್ಜಿ ಕೊಂಡರೆ,
ಕಣ್ಣ ಪರದೆ ತುಂಬಾ ಬಣ್ಣ
ಯಾರೋ ಚೆಲ್ಲಿ,ಸ್ವಲ್ಪ ಒರೆಸಿ ಹೋದಂತೆ,
ಗೋಜಲು, ಗೋಜಲು
ಇದು ಪ್ರತಿ ದಿನದ ಮಾಮೂಲು.


ಸುಮ್ಮನೆ ಹಾಗೆ ಒಂದಷ್ಟು ಹೊತ್ತು ಕಣ್ಣು ಮುಚ್ಚಿಕೊಂಡೆ, ಬೊಂಬೆ  ಬಿಂಬ ತೇಲಿ ಬಂತು, ಎಂದಿನಂತೆ. . ... . . . . .. !!. ಜಾಸ್ತಿ ನೋಡುವ ಆಸೆ , ಕಣ್ಣು ತೆರೆಯಬೇಕು ಅನ್ನಿಸಲಿಲ್ಲ,ಮನಸು ನಿನ್ನ ಸುತ್ತಲೇ ಸಮಾಧಿಯಾಗಿತ್ತು, ಕಾರಣಗಳಿಗೆ ಶಬ್ಧ, ವ್ಯಾಕರಣಗಳ ಸೇರಿಸಿ, ಹೇಳಿಬಿಟ್ಟರೆ , ಬರೆದರೆ, ಮತ್ತೆ ಎಲ್ಲ  ಖಾಲಿ ಖಾಲಿ. ಎದೆಯ ಕರ್ಟನ್ ತೆಗೆದು ಬಿಟ್ಟಂತೆ.!!

ಕಣ್ಣ ಮುಚ್ಚಿದರೆ
ಕಣ್ಣ ಪರದೆ  ಮೇಲೆ
ನೀನೇ ರಂಗನಾಯಕಿ.
ಕಣ್ಣ ತೆರೆಯಬೇಕು
ಅನ್ನಿಸುತ್ತಿಲ್ಲ
ನಾ ಕನಸಿನಲೇ ಪರಮ ಸುಖಿ.


bottom ಲೈನ್ ,

ಜಾತ್ರೆ ತುಂಬಾ ತಿರುಗಿ ಮತ್ತೆ ಅಲ್ಲಿಗೇ ಬಂದೆ. ಅದೇ ಅಂಗಡಿಗೆ, ಬೊಂಬೆ ಅಲ್ಲೇ ಇತ್ತು. ಖಾಲಿ ಜೇಬಿನೊಳಗೆ ಖಾಲಿ ಕೈ, ನಿಂತು ಹಾಗೇ ನೋಡುತಿದ್ದೆ, ಬೊಂಬೆಯ ಕಡೆಯದೊಂದು ಚಿತ್ರ ಎದೆಯೊಳಗೆ ಅಚ್ಚು ಒತ್ತುವ ತವಕದೊಂದಿಗೆ. ಅಂಗಡಿಯ ಮಾಲೀಕ ಎಲ್ಲ ಮುಚ್ಚಿಟ್ಟು, ಜಾತ್ರೆ ಮುಗಿಸಿ ಜಾಗ ಖಾಲಿ ಮಾಡುವ ಅವಸರದಲ್ಲಿದ್ದ,

ಬೊಂಬೆ ಮತ್ತೆ ಅಂಗಡಿಯವನ ಚೀಲ ಸೇರಿತ್ತು. ನಾ ಜಾರೊ ಕಂಬನಿ ಒರೆಸಿಕೊಳ್ಳಲು , ಖಾಲಿ ಜೇಬಿನಿಂದ ಕೈ ಎಳೆದು ಕೊಂಡೆ.

ಎದೆಯ ಕೊಳದಲಿ
ಬಗ್ಗಿ ನೋಡಿದರೆ
ಕಣ್ಣಿಂದ ಜಾರಿ ಬಿದ್ದ
ಕಂಬನಿಗೆ ,
ನಿನ್ನ ಪ್ರತಿಬಿಂಬ ಮೆಲ್ಲ
ಚದುರುತಿತ್ತು.

ಜಾತ್ರೆ ಮುಗಿದಿತ್ತು, ನಾ ಮುಂದಿನ ವರುಷ ಬೊಂಬೆ ಕೊಳ್ಳಲು ದಿನ ಎದುರು ನೋಡುತಿದ್ದೆ. ಖಾಲಿ ಜೇಬಿನ ತುಂಬಾ ಒಂದಷ್ಟು ಹಣ ತುಂಬಿಸಿಕೊಳ್ಳುತ್ತ.

ಜಾತ್ರೆ ಮತ್ತೆ ಬರುವುದು . . . . . . . . . . . . . . .  . .  .!!!!!!





.....................................................................................................................ಸುಕೇಶ್


Monday, February 6, 2017

ಅಂತರಾತ್ಮ

ಬೀಳೋ ಮುಂಚೆ
ಹೇಳೋ ಕೋಲು
ತಿಳಿದೋ
ತಿಳಿಯದೆಯೋ
ಮತ್ತೆ ಹಿಂಬಾಲಿಸುತೇನೆ
ಸರಿಯಾಗಿ ದಾರಿ ಹೇಳು.

ಸಣ್ಣ ಸದ್ದು
ನನಗಷ್ಟೇ ಕೇಳುತ್ತದೆ
ಎದೆಯ ಬಡಿತಕ್ಕಿಂತಲು
ಮೆಲ್ಲಗೆ.
ಕ್ಷೀಣ ಕಿವಿ,
ಸುತ್ತಮುತ್ತಲ
ಗೌಜು ಗದ್ದಲದ ನಡುವೆ
ತಡವರಿಸಿ, ಎದ್ದು ಬಿದ್ದು
ನಡೆಯುದು ಎಲ್ಲಿಗೆ.

ಬೆಳಕ ಕಿಡಿ ಕಣ್ಣ ಮುಚ್ಚಿದರು
ಕಾಣುತ್ತದೆ.
ಪುಟ್ಟ ಪುಟ್ಟ ಹೆಜ್ಜೆ
ಬಹು ದೂರ ಪಯಣ
ವಿರಮಿಸೋಣವೆಂದರೆ
ಕಿಡಿ ಆರಿ ಹೋಗುವ ಭಯ.

ಕಿರಿದು ದಾರಿ
ಎಲ್ಲ ಮುಗಿದು
ಕೊನೆಗೆ  ನಿಂತರೆ,
ಸರಿದ ದಾರಿಯ ತುಂಬಾ
ಅಲ್ಲಲ್ಲಿ ಬರೆದ ಅಸ್ಪಷ್ಟ ಮೈಲು ಕಂಬ.
ಹಾರೋ ಹಕ್ಕಿ, ಖಾಲಿ ಗೂಡು,
ಬದುಕು ಕೊನೆಯಿಂದ
ಮತ್ತೆ ಪ್ರಾರಂಭ.

ಎಲ್ಲ ಎಲ್ಲೆಯ ಮೀರಿ
ಬರದ  ನಾಳೆಯ,
ಇರದ ನಿನ್ನೆಯ ,
ಮರೆತ ಇಂದಿನ
ತುಂಬಾ ನನಗಾಗಿ ಬದುಕಿದ್ದು
ಒಂದಷ್ಟು ಹೊತ್ತು,
ಅದೆಷ್ಟೆನ್ನುದು ನನಗಷ್ಟೇ ಗೊತ್ತು.


ದಾರಿ ಹೇಳೋ ಕೋಲು,
ಎದೆಯೊಳಗಿನ ಸಣ್ಣ ಸದ್ದು
ಕಣ್ಣ ಕಿಡಿ,
ಬಿಡದೆ ಹಿಂಬಾಲಿಸಬೇಕು
ದಯವಿಟ್ಟು ದಾರಿ ಬಿಡಿ .

ಹೃದಯ

           ಒಂದೊಮ್ಮ, ವೈಭವದ ಹಂಪಿ.  ಕೋಟೆ ಕೊತ್ತಲಗಳ  ಸುತ್ತಲಲ್ಲಿ ಜನ.  ಸಂಗೀತ,ಮಾಧುರ್ಯ  ಮೆರವಣಿಗೆ, ಕವಿಯ ಬರವಣಿಗೆ, ಸಿಂಹಾಸನದ ಗಾಂಭಿರ್ಯ, ಎ...