ನಾನು ನಾನಾಗದಿರುವಾಗ
ನನ್ನೊಳಗೆ ನಾನ್ಯಾರು ?
ಪ್ರಶ್ನೆಗಳ ವರ್ತುಲ
ಉತ್ತರದ ಕೈಚೀಲ
ತಡಕಾಡಿದಸ್ಟು
ಮುಗಿಯದ ಗೊಂದಲ.
ಸುಮ್ಮನೆ ಕುಳಿತು
ನನ್ನ ಹಿಂದೆ ನಾನೇ ಅವಿತು
ಆಡಿಕೊಂಡ ಆಟ
ಕಣ್ಣಾಮುಚ್ಚಾಲೆಯಂತೂ ಅಲ್ಲ,
ಬಣ್ಣದ ಮುಖವಾಡ
ಮಾಸಿಹೋಗಬಹುದೆಂಬ
ಭಯಕ್ಕೆ
ಬೆದರಿ,ಬೆವರಿ ಒಂದಷ್ಟು
ನಾ ಕಂಡರೆ, ಕ್ಷಮಿಸಿ
ನಾ ಅವನಲ್ಲ.
ಕುಣಿಕೆಯ ಕೊನೆಗೆ
ನಾ ಅಲ್ಲದ ನನ್ನ
ನೇತಾಡಿಸಿ,ನರಳಿಸಿ
ಮುಗಿಸಿಬಿಟ್ಟರೆ?
ನೀವು ಪರಿಚಯದ
ನಗೆ ಬೀರುದು ಹೇಗೆ?
ನನ್ನ ಬಿಟ್ಟ ನಾನು
ನಿಮಗೆ ಅಪರಿಚಿತ
ನನಗಷ್ಟೇ ಚಿರಪರಿಚಿತ.
ಒಂದು ದಿನ ನೀವು,
ಹಠ ಹಿಡಿದು
ನನ್ನೊಳಗಿನ ನನ್ನ
ಹುಡುಕ ಹೊರಟರೆ?
ನಾನಲ್ಲದ ನನ್ನ
ನಾನೇ ಆವರಿಸಿ,
ನಿಮ್ಮನ್ನೆಲ್ಲ ಯಾಮಾರಿಸಿ
ಸದ್ದೇ ಮಾಡದೆ ಎದ್ದು ಹೋಗುವೆ.
ಆಗ ನೀವು,
ನಿಮ್ಮೊಳಗಿನ ನಿಮ್ಮ ಹುಡುಕಿಕೊಳ್ಳಿ.
ನಾನು ನಾನಾಗಿರುವಾಗ
ನನ್ನೊಳಗೆ ಮತ್ತೆ ನೀನ್ಯಾರು?.
ನನಗೆ ಎರಡು ನೆರಳು
ಒಂದು ನನ್ನದು,
ಇನ್ನೊಂದು ನನ್ನದೇ.!!
ಪ್ರಶ್ನೆಗಳಿಗುತ್ತರ
ಲೀಲಾಜಾಲ,
ಎಲ್ಲ ನನ್ನೊಳಗಿನ ನನ್ನ
ಮಾಯಾಜಾಲ.
------------------------------------------------------------------ಸುಕೇಶ್ ಪೂಜಾರಿ