ನವದ್ವಾರಗಳ ನಗರ
ತಲೆ ಗೋಪುರ
ಕಂಡು ಕಾಣದೆ
ಸುಮ್ಮನಿರುದೇ ಕಣ್ಣು
ಕೇಳಿಯು ಕೇಳದಂತಿರಲು
ಕಿವಿಗೆ ಭೋದಿಸಿ .
ಎದೆ ಹೊಡೆವ ಘಂಟೆ,
ರಕ್ತದ ಚಲನೆ
ಶುದ್ಧ,ಕಲ್ಮಶಗಳ ನಡುವೆ.
ಒಂದೆಡೆ ನಿಲ್ಲದ ಕಾಲು
ನಗರವನ್ನೇ ಎತ್ತಿ ಸಾಗಿದೆ
ಅಲ್ಲಿಂದ ಇಲ್ಲಿಗೆ
ಇಲ್ಲಿಂದ ಎಲ್ಲಿಗೆ? .
ಮೌನಿಯಾಗದ ಬಾಯಿ
ಬತ್ತದ ಕೊಳವೆ ಬಾವಿ,
ಮುಚ್ಚಿಕೊಂಡರೆ ನಗರವೇ
ಖಾಲಿ,ಖಾಲಿ,ನೀರವ
ಬಂಧಿ ಹಕ್ಕಿಯ ಗುಟುರಿಗೆ
ನಗರದ ಮೂಲೆ, ಮೂಲೆ,
ಪ್ರತಿಧ್ವನಿಗಳ ಸ್ಥಾವರ.
ಎಲ್ಲ ಕಡೆ ತೋರುವ ಮೂಗು,
ಎಲ್ಲ ಕಲಿವ ಹಂಬಲದ ಮಗು.
ಗದರಿಸಿ,ಮಲಗಿಸಿ
ಹೆಗಲಿಗೇರಿಸಿಕೊಂಡರೆ
ಗಾಳಿ ಚೀಲ
ನಾ ಹರಕಲು ಕುಚೇಲ.
ನಗರ ನಿನ್ನದು
ನನಗೆ ಒಂದಷ್ಟು ದಿನದ ಗುತ್ತಿಗೆ
ಮರೆತು,
ಸುಖಾಸುಮ್ಮನೆ ಮಲಗಿದ್ದೆ.
ಎಬ್ಬಿಸು,ಉದ್ಧರಿಸು,
ಶುದ್ದೀಕರಿಸು,
ನಿನ್ನ ಸಾಕ್ಷಾತ್ಕಾರದ ಭಕ್ತಿಗೆ,
ಮುಕ್ತಿಗೆ.
--------------------------------------------------------------------------ಸುಕೇಶ್
No comments:
Post a Comment