ಸಿಗರೇಟು ಮತ್ತು ಹೊಗೆ

ತುಟಿಯ ಕುಲುಮೆಗೆ ಇಂಧನವಾಗಿ,
ಉರಿವ ಸಿಗರೇಟಿನ
ಶವದ ಬಿಸಿ ಹೊಗೆಗೆ
ಎದೆಯ ಸ್ತಭ್ದ  ಚಿತ್ರಗಳು ಮಬ್ಬಾಗುತಿತ್ತು.

ಕಣ್ಣ ಕೊನೆಯಲ್ಲಿನ ಕೆಂಪು ಬೆಂಕಿ ಉಂಡೆ
ಮೆಲ್ಲ ಮೆಲ್ಲನೆ ಉರಿದು
ತುಟಿಯ  ಚರ್ಮ ಸೋಕಿದಾಗಲೆ
ಅರಿವಾದದ್ದು ಸುಟ್ಟುಕೊಳ್ಳುವ ನೊವು.

ಇರುಳ ಕತ್ತಲಲ್ಲಿ, ಬಿಳಿಯ ಹೊಗೆ
ಶಾಂತಿ ಸಾರುತ್ತಾ ನಡೆದ ದಾರಿಯನ್ನೇ
ನೋಡುತ್ತಿದ್ದ ನನಗ
ಚಂದಿರ ಮೋಡ ಮರೆಗೆ ಹೋಗಿ
ಮೆಲ್ಲ ಕೆಮ್ಮಿದ್ದು ಕೇಳಲೇ ಇಲ್ಲ.

ಕೆಳಗೆ ಬಿದ್ದ ಬೂದಿಯೊಳಗಿನ ಕೆಂಡ
ಗಾಳಿ ಜೊತೆ ಹೋರಾಡಿ
ಬೂದಿಯಾದಾಗ
ಗಾಳಿ ಚೀಲ ಸೇರಿದ ಹೊಗೆ
ತನ್ನ ಕೆಲಸ ಮಾಡಿ ಈಚೆ ಬಂದಿತ್ತು.

ನೀರವ ರಾತ್ರಿ,
ಸಣ್ಣನೆ ಕೆಮ್ಮು ಉರಿದ ಬೇಗೆ,
ಉರಿದ ಸಿಗರೇಟಿನ ಶವಕ್ಕೆ
ಶ್ರದ್ದಾಂಜಲಿ ಸಲ್ಲಿಸುತಿತ್ತು .

ಸುಕೇಶ್